2021 թվականի հունվարի 22-ին, ժամը 00.05-ին, անհայտ անձը զանգել էր  ԱՀ ոստիկանության Ստեփանակերտ քաղաքի վարչություն և հաղորդել նույն քաղաքի  Հ.Բաղրամյանի փողոցում, Եղբայրական գերեզմանոցի աստիճանների մոտակայքում, Ստեփանակերտ քաղաքի բնակիչ Արթուր Ապրեսյանի դիակը հայտնաբերելու վերաբերյալ:

Կատարված դեպքի վայրի զննությամբ Ստեփանակերտ քաղաքում տեղակայված` ԱՀ առողջապահության նախարարության «Մոր և մանկան  առողջության պահպանման կենտրոնիե նորակառույց  շենքի դիմացի ճանապարհահատվածին կայանված <Հունդայի>  մակնիշի ավտոմեքենայի սրահում, վարորդի նստատեղում,  հայտնաբերվել է Ա.Ապրեսյանի դիակը` գլխի քունքային հատվածում հրազենային վնասվածքով, որի աջ ձեռքում առկա է եղել  ատրճանակ:

Նկատի ունենալով, որ նկարագրված դեպքն  իր մեջ  առերևույթ պարունակում է  ԱՀ քրեական օրենսգրքի 109-րդ հոդվածի 1-ին մասով նախատեսված հանցագործության հատկանիշներ  /Ինքնասպանության հասցնելը/, 22.01.2021թ. ԱՀ քննչական կոմիտեի տարածքային քննչական վարչության պետի կողմից հարուցվել էր քրեական գործ, որի նկատմամբ  հսկողությունը և  դատավարական  ղեկավարումն իրականացնում էր ԱՀ Ստեփանակերտ քաղաքի դատախազությունը:

Հիշյալ քրեական գործով մինչդատական վարույթի օրինականության նկատմամբ դատախազական հսկողությունը և դատավարական ղեկավարումը ԱՀ գլխավոր դատախազի որոշմամբ 23.02.2021թ. փոխանցվել է ԱՀ գլխավոր դատախազության Մարդու դեմ ուղղված հանցագործությունների գործերով բաժնին:

Ծանուցում.  Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ԱՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: